Filipino: Wika ng Saliksik

"Nagdudulot sa akin ng di matingkalang kasiyahan na maipahayag ko sa inyo na ngayong ika-41 na anibersaryo ng pagmamartir ng nagtatag at pinakadakilang nagtatag ng nasyonalismong Pilipino, ay naging karangalan kong ilagda, bilang pag-alinsunod sa utos ng Konstitusyon at ng umiiral na batas, ang isang Kautusang Tagapagpaganap na nagtatalaga sa isa sa mga katutubong wika na maging batayan ng wikang pambansa ng bayang Pilipino", inihayag ng Ama ng Wikang Pambansa, ang dating Pangulo ng Pilipinas, Manuel L. Quezon, noong ika-30 ng Disyembre, 1937, na inayon sa Executive Order No. 134. Maraming proklamasyon ang ginawa upang palitan o baguhin ang petsa ng pagdiriwang ng Pambansang Wika, at noong ika-15 ng Enero, 1997, ipinahayag ng dating Pangulo na si Fidel V. Ramos na ang buong buwan ng Agosto ay ang "Buwan ng Wikang Pambansa".

Ang Komisyon ng Wikang Filipino, o KWF, kasama ang Department of Education (DepED), ay naatasan upang pangunahan ang isang buwang pagdiriwang. At ngayong taong 2018, ang tema ng Buwan ng Wika ay, "Filipino:Wika ng Saliksik" (Filipino: Language of Research). Marami ang mga kaganapan tuwing ipinagdiriwang ito; ang sabayang pagbigkas, balagtasan, paggawa ng posters, slogans, paggawa ng sanaysay, pagbigkas ng tula, pagsayaw ng mga katutubong sayaw, at pag-awit ng mga katutubong awit. Ang mga layunin ng pagdiriwang ay upang lubos na maipatupad ang Presidential Proclamation Number 1041, series of 1997; upang hikayatin ang mga iba't ibang ahensiya ng gobyerno at mga pribadong sektor na mas palawigin at itaguyod ang wikang Filipino; upang hikayatin at bigyang inspirayon ang mga Pilipino na mas lalong tangkilikin, mahalin at pahalagahan ang pambansang Wika.

May mga mamamayang Pilipino ang mas pinipili ang ibang lenggwahe kaysa sa ating sariling wika. Atin silang hikayatin at ihayag na dapat pahalagahan ang sariling atin upang mas lalo tayong magkaisa sa paglalawig ng wikang Filipino, ang Wika ng Saliksik.